د امریکا متحده ایالاتو حکومت اعلان کړی چې هغو افغان کډوالو ته چي نژدې یو کال يې په دغه هیواد کي ژوند کړی دی، د موقتي اقامت اجازه ورکوي. په دغه پرېکړه کي هغه کسان نه دي شامل چي د تخلیې په پروګرام کي امریکا ته تللي دي.
د امریکا د کورني امنيت وزارت د پنجشنبې په ورځ اعلان وکړ، چي د موقت حفاظت اجازه هغه چاته ورکول کیږي، چي د ۲۰۲۲مېلادي کال د مارچ میاشتي له ۲۰ نېټې څخه بیا د ۲۰۲۳مېلادي کال د سپټمبرمیاشتي تر ۲۰ نېټې پوري دغه هیواد ته ورکډوال سوي دي، چي ټولیزه شمېره يې ۱۴ زره او ۶۰۰ تنو افغانانو ته رسیږي.
دا ډول اجازه افغان مهاجرو ته په امریکاکي د اوږدې مودې له پاره د پاتيدو يا د دغه هېواد اقامې ته لار نه هواروي. د دې اجازې له مخې دغه کډوال کولای سي، چي تر ۲۰۲۵مېلادي کال پوري په امریکا کي و اوسي او بیا به يې د اجازې وخت زیات کړل سي. دا حالت دوی له شړلو ژغوري او د کار اجازه هم ورته چمتو کوي.
