په افغانستان کې د اسلامی امارت حکومت د لوړو زدکړو چارسمبالي وزیر ویلي ځینو هېوادونو ته یې پلاوي استولي چې د پوهنتون استادان بېرته هېواد ته وبولي.
د اسلامی امارت حکومت د لوړو زدکړو چارسمبالي وزیر مولوي ندا محمد ندیم دغه خبرې د بلخ پوهنتون له استادانو او محصلینو سره په غونډه کې کړې او زياته کړې يې ده، سلګونه میلیونه افغانۍ د ښوونکو د ظرفیت لوړونې ته ځانګړې شوي دي.
نوموړی وايي، له هېواده تللي ځینې استادان تکړه دي نو دوی غواړي چې هغوی بېرته هېواد ته ستانه شي.
د لوړ زدکړو وزارت یو کال وړاندې هم له بهرته تللو استادانو وغوښتل چې هېواد ته ستانه شي، ځکه د راپورونو له مخې لږترلږه په کابل پوهنتون کې ځینې داسې څانګې شته چې له نیمايي ډېر ښوونکي یې له افغانستانه وتلي دي.