افغانستان کې د اسلامي امارت له واکمنېدو وروسته د کورنیو چارو وزارت سرپرست، سراج الدین حقاني په لومړي ځل پنجشیر ولایت ته سفر وکړ.
په دغه سفر کې د پنجشیر اوسېدونکو لپاره ګڼ پیغامونه نغښتي دي.
سراج الدین حقاني، په یوه ولسي غونډه کې د خبرو پر مهال وايي، د مخالفتونو وخت پای ته رسېدلی او اړتیا ده چې د باور جوړونې لپاره هلې ځلې و شي.
د کورنیو چارو وزارت سرپرست، سراج الدین حقاني وویل: «چې زموږ ستاسې ترمنځ دا اړیکې دومره عادي شي چې زه دا محسوسوم چې دا زما خپل ذاتي ورور دی او ته هم دا محسوسوې چې دا ستا ذاتي ورور دی بیا په منځ کې دا ستونزې په خپله حل کیږي.»
د کورنیو چارو وزارت سرپرست، د پنجشیر پر مشرانو هم غږ وکړ چې هېواد ته د راستنیدو لپاره د اسلامي امارت دروازې د ټولو لپاره پرانیستې دي.
د کورنیو چارو وزارت سرپرست، سراج الدین حقاني زیاته کړه: «تاسو د خپلو مشرانو سره ډېره وفاداري وکوله، هغوی مشرانو ته ستاسو په مخ، ستاسو په تضمین ټولې دروازې خلاصې دي. تاسو ته د دوی له امله ستونزې پېښیږي، موږ کوشش کړی چې د پنجشیر ولس نور و نه ځوریږي.»
د کورنیو چارو وزارت سرپرست داسې مهال په لومړي ځل پنجشیر ته سفر کوي چې تر دې مخکې یې د هېواد ۲۶ ولایتونو ته سفرونه کړي دي.
