د پاکستان خونړي پرون ته غبرګونونه؛ موقت صدراعظم: د وروستي ترهګر تر ختمولو به د ترهګرۍ خلاف مبارزه وکړو

د پاکستان چارسمبالي صدراعظم انوارالحق کاکړ ویلي، د ترهګرۍ پر ضد مبارزه به د وروستي ترهګر تر ختمولو پورې روانه وي.
کاکړ دا خبره په پاکستان کې د وروستیو مرګونو بریدونو په غبرګون کړې ده.
پرون د بلوچستان په مستونګ او د خیبرپښتونخوا په هنګو کې بمي چاودنو لږ تر لږه ۵۷ کسان وژلي او شاوخوا اویا تنه نور یې ژوبل کړي.
رویټرز اژانس د پولیسو او روغتیاپالانو په حواله ویلي چې د مستونګ په برید کې لږ تر لږه ۵۲ کسان وژل شوي او ۵۸ نور ټپيان دي.
د خیبرپښتونخوا په هنګو سیمه کې هم په ورته برید کې لږ تر لږ ۵ کسان مړه او ۱۲ نور ټپیان شوي.
د ځینو ټپیانو حالت د اندېښنې وړ بلل شوی.
په دواړو سیمو کې بریدګرو هغه خلک هدف وګرځول چې په جوماتونو کې یې حضرت محمد د میلاد د مراسمو د لمانځلو لپاره ټول شوي وو.
د پاکستان چارسمبالی صدراعظم انوارالحق کاکړ چې د راپورونو له مخې د عمرې لپاره سعودي عربستان ته تللی، په خپله اېکس پاڼه دغه مرګوني بریدونه غندلي.
کاکړ ویلي هېواد به یې د وروستي ترهګر تر ختمولو پورې د ترهګرۍ پر ضد مبارزې ته دوام ورکوي.