پداسې حال کې چې د متحده ایالاتو د کانګرس د سنا په مجلس کې د بهرنیو چارو او دفاع وزیرانو د اسرائیل، اوکراین او سرحدي امنیت لپاره د ۱۰۶ ملیارد ډالرو بودجې په هکله د سناتورانو پوښتنو ته ځوابونه ورکول، څو تنو د جګړې ضد مظاهره چیانو دا غونډه څو ځله اخلال کړه.
د بهرنیو چارو وزیر انټوني بلینکن او د دفاع وزیر لویډ آسټن د سنا مجلس د بودجې ځانګړې کولو کمیټې د غړیو پوښتنو ته سه شنبه اکټوبر ۳۱ (لړم۹) ځوابونه ورکړل.
مظاهره چیانو په امریکایي چارواکو تور لګاوه چې په غزې کې د فلسطینیانو “نسل وژنې” سره مرسته کوي.
د متحده ایالاتو حکومت د کانګرس څخه غواړي چې ۶۱.۴ ملیارده ډالر د اوکراین سره د مرستو لپاره منظور کړي چې د امریکایي چارواکو په وینا د دې پیسو نیمایي به یې په متحده ایالاتو کې دننه د هغو وسلو ذخیرو په بیرته ډکولو ولګیږي چې تر دې وړاندې کیف ته ورکړل شویدي.
د بایډن حکومت همدارنګه د اسرائیل سره د مرستو لپاره ۱۴.۳ ملیارده ډالر غواړي او ۹ ملیارده یې د بشري مرستو لپاره غوښتي چې د غزې او اسرائیل لپاره به ولګول شي.
حکومت همدرانګه د کانګرس څخه غواړي چې ۱۳.۶ ملیارده ډالر د سرحدي امنیت او ۴ ملیارده نور ډالر د دې لپاره منظور کړي چې په آسیا کې د چین د سیمه ایزو هلو ځلو پر ضد مقابله پرې وشي.
د متحده ایالاتو دې دوو جګپوړو چارواکو د استماعیه غونډې پر مهال څو تن مظاهره چیانو چې په غونډې کې ناست و، لاسونه یې د اعتراض په توګه په وینو سره کړي و او د جګړې ضد شعارونه یې ورکول.
په غزه کې د اسراییلو د جګړې مخالفانو د امریکا د کانګرس نه وغوښتل چې اسراییلو ته مالي مرستې بندې کړي
Byadmin
Nov 1, 2023