د ننګرهار ولایت د کانال وادي کرنیزشرکت مسوولینو ويلي؛ د زیتونو سږنی حاصل څه کم درې سوه ټنه دی، چې درې زره لیتره خالص تېل به ترې ترلاسه شي.
د ننګرهار کانال وادي کرنیزشرکت رييس غلام الرحمن کظیم وایي: د تېر کال پر پرتله سږ کال زمونږ حاصلات دوه برابره شوې دي. تېر کال د زیتونو حاصلات ۱۵۰ یا ۱۶۰ ټنه ول؛ خو سږ کال شاوخوا ۳۰۰ ټنه زیتون لرو.
د زیتونو په دغه فابریکه کې پر کار بوخت کارګر خوښ دي، چې د کورنیو تولیداتو په دغه فابریکه کې ورته د کار کولو زمینه برابره شوې؛ خو له مسوولینو غواړي، چې د دغې فابریکې د نور پرمختګ لپاره دې دغې فابریکې ته پاملرنه زیاته شي.
باغچه ګل نومی کارګر وايي: مونږ له چارواکو غوښتنه کوو، چې د تولید د کچې د لوړولو لپاره مونږ ته اسانتیاوې برابرې کړي. کله، چې د تولید کچه لوړه شي؛ ور سره به پرسونل ته اړتیا هم ډېره شي.
د ننګرهار کانال رييس وايي، د زيتونو د توليد په شرکتونو کې ۷۰۰ کسان په مستقيم ډول او څه باندې څلور زره کسان په غير مستقيم ډول کار کوي.
د نوموړي د څرګندونو له مخې: زمونږ اداره ۷۵۰ کسان لري. له دوی څخه ۷۰۰ برحال دي. په ټولیز ډول دلته له ۴۰۰۰ څخه تر ۴۵۰۰ کسانو ته د کار زمینه برابره شوې ده.
د ننګرهار د زیتونو د غوړیو د تولید شرکت د هېواد یو له پخوانیو شرکتونو څخه دی، چې د روسیې پر مالي مرسته په ۲۷ هکتاره ځمکه کې تاسیس شوی او دغه شرکت د تېلو د تولید ښه وړتیا لري.
ویل کیږي، چې د کورنیو بازارونو ترڅنګ یې اوسمهال دلته د زیتونو تولید شوو تېلو ته په نړیواله کچه هم بازار موندلی او خلک يې ښه خوښوي.
د ننګرهار زیتونو دا فابریکه په هېواد کې له پخوانیو فابریکوڅخه ده، چې د روسيې پر مالي مرسته په ۲۷ هکتاره ځمکه جوړه شوې او په ۱۳۶۳ کال کې یې چارې پیل شوي دي. هغه مهال يې د څلور زره مټریک ټنو زیتونو د تولید وړتیا لرله.
ویل کیږي، چې د زیتونو وراخوا د کانال د ستروسو بوټو حاصلاتو کې هم هر کال زیاتوالي راځي او مالټي يې بیا د هېواد د بېلابېلو سیمو ترڅنګ له هېواد بهر هم صادریږي.
