په دې وروستیو کې د سعودي عرب او اسرائیلو ترمنځ ډپلوماتیکو اړیکو د پيل په اړه بېلابېلې څرګندونې شوې. له یوې خوا د امریکا اوسنی حکومت هڅه کوي د بایډن د اوسنۍ واکمنۍ له پای ته رسېدو وړاندې سعودي اسرائیل په رسمیت وپېژني. له بلې خوا اسرائیل هم د داسې یوه پرمختګ هڅه کوي، ځکه چې له سعودي سره اړیکي یې ښايي نورو عربي او اسلامي هېوادونو سره اړیکو ته لاره پرانیزي.
خو سعودي د دې لپاره خپل شرطونه لري. که څه هم د رسمي دریځ له مخې سعودي د فلسطین مسلې هواري ته لومړیتوب ورکوي خو په نارسمي ډول له اسرائیلو سره د اړیکو پیلولو لپاره د سوله ییز اټومي پروګرام لرل د سعودي له مهمو شرطونو بلل کېږي.
