د ملګرو ملتونو امنیت شورا په بغلان ولایت کې د شیعه ګانو پر یوه جومات د جمعې د ورځې حمله وغندله.
امنیت شورا بېګا ناوخته په یوه بیان کې دا یوه بېرحمانه بللې، د دې چاودنې له قربانیانو سره یې خواخوږي ښودلې او ویلي یې دي، تروریزم چې په هره بڼه وي، سوله ګواښي او له تنظیوونکو او تمویلوونکو سره یې باید حساب کتاب وشي.
د جمعې په ورځ د بغلان ولایت په مرکز پلخمري کې د امام زمان په نوم د شیعه ګانو په یو جومات کې چاودنې د طالبانو د سیمه ایزو چارواکو په وینا اووه تنه لمونځ کوونکي ووژل او ۱۵ نور یې ټپیان کړل.
