د سترو ننګونو پر وړاندې د چمتووالي لپاره له افغانستان څخه د ځواکونو ایستل اړین ول – امریکا

د سپینې ماڼۍ د ملي امنیت سلاکار څرګنده کړې، چې له افغانستان څخه د امریکايي ځواکونو وتل د سترو ننګونو پر وړاندې د امریکايي پوځ د چمتووالي لپاره اړین ول.
په تېرو دوه کلونو کې له افغانستان څخه د امریکايي ځواکونو ناندریزې وتنې په امریکا کې دننه هم ډېرې نیوکې راپارولي دي؛ د سپینې ماڼۍ د ملي امنیت سلاکار په دې وروستیو کې ویلي، چې له افغانستان څخه د امریکايي پوځیانو وتل د دې لپاره اړین ول، چې پر نړیواله کچه له نورو ستونزو سره مبارزې ته ځان چمتو کړي.
د سپینې ماڼۍ د ملي امنیت سلاکار جیک سالیوان د فارن افیرز اوونیزې ته په یوه مقاله کې لیکلي، چې په اوکراین کې د روسیې برید له غوښتنې ډېر چټک تر سره شو او که امریکا اوس هم د افغانستان په جګړه کې ښکېله وای؛ نو روسیې به د امریکا تمرکز پر افغانستان ساتلی وای.
د سپینې ماڼۍ د ملي امنیت سلاکار څرګنده کړې: له افغانستان څخه د ځواکونو وتل بې له شکه دردناک ول، په ځانګړي توګه د افغانستان د خلکو او د هغو امریکايي پوځیانو او پاتې پرسونل لپاره، چې هلته یې خدمت کړی دی؛ خو دا اړینه وه، چې د امریکا پوځ د راتلونکیو ننګونو لپاره چمتو شي. یو له دغو ننګونو څخه، چې مونږ یې وړاندویېنه کړې وه د ۲۰۲۲ ز.کال د فبرورۍ پر ۲۴ پر اوکراین د روسیې یرغل و، چې زمونږ له اټکله چټک تر سره شو.
که څه هم له افغانستان څخه د امریکايي ځواکونو وتلو د سیمې او نړۍ د هېوادونو تر منځ له افغانستان څخه د تروریستي ګواښونو د زیاتوالي په اړه اندېښنې راپورته کړي؛ خو د سپینې ماڼۍ د ملي امنیت سلاکار ټینګار کوي، چې امریکا به په افغانستان کې نړیوال تروریستان له لرې پر نښه کوي؛ خو بیا به هیڅکله اوږدې جګړې ته دننه نه‌شي.
د پوځي چارو شنونکي په دې باور دي؛ د سپینې ماڼۍ د ملي امنیت سلاکار دغه لیکنه ښيي، چې د نړۍ سیاسي پرمختګونو افغانستان د امریکا له لومړیتوبونو څخه لرې کړی او له همدې کبله امریکا له افغانستان څخه خپل ځواکونه وایستل.
دوی زیاته کړې، چې افغانستان د امریکا د سترو سیمه ییزو او نړیوالو سیاستونو قرباني شوی دی.
په افغانستان کې د جمهوري نظام له ړنګېدو او د اسلامي امارت له رامنځته کېدو سره د ۲۰۲۱ ز.کال د اګست پر ۳۱ وروستي امریکايي سرتېري ووت. یو شمېر امریکايي سیاستوال او د امریکا د کانګرس غړي له افغانستان څخه د امریکايي ځواکونو وتل بې پلانه، ګډوډ او ناندریز بولي او ټینګار کوي، چې له افغانستان څخه د امریکايي ځواکونو وتلو روسیه وهڅوله، چې پر اوکراین برید وکړي او په سیمه کې د امریکا دریځ کمزوری کړي.