د راډیو نړۍواله ورځ؛ د فبرورۍ ۱۳مه د راډیو له نړیوالې ورځې سره برابره ده.

دا ورځ ۲۰۱۱ کال کې د ملګرو ملتونو د پوهنې، کلتور او ساينس ادارې غونډه کې د اسپانيا د وړانديز له مخې په ګوته شوه، او ورپسې کال د ملګرو ملتونو عمومي اسمبلۍ کې په ټوليز ډول ومنل شوه، او د نړيوالې ورځې په توګه یې اعلان کړه.

يونېسکو وايي د راډيو نړيوالې ورځې ټاکنې تر شا لامل دا دی، چې دا يوه ارزانه او يوه مشهوره وسيله ده، چې کولی شي تر ټولو لرې پرتو سيمو او ګوښيو شوو ټولنو ته معلومات، پوهنه او پيغام ورسوي.

راډیو هغه غږیزې رسنۍ ده چې د افغانستان په لېرې پرتو سیمو کې په ډېره اندازه اورېدونکي لري او د هېواد پر اساسي مسایلو د هېوادوالو د خبرولو غوره وسیله ده.

په افغانستان کې په لومړي ځل کابل راډیو په ۱۳۰۴ لمریز کال کې د افغانستان د وخت د پادشاه امیر امان الله خان په وخت کې فعالیت پیل کړ.

د راډیو نړۍوالې ورځ سره جوخت په افغانستان کې د ملګرو ملتونو مرستندویه پلاوي (یوناما) ویلي چې له راډیو پرته د نړۍ تصور کول ګران کار دی. او په افغانستان کې اطلاعاتو ته د لاس‌رسي پر حق ټینګار وکړ.

یوناما د سې‌شنبې ورځ، سلواغې پر ۲۴مه په خپلې اېکس پاڼې کې لیکلي چې په افغانستان کې «اطلاعاتو ته د لاس‌رسي او د بیان ازادۍ له حقه» ملاتړ کوي.

د دغه بنسټ د معلوماتو پر بنسټ، دمګړۍ په افغانستان کې ۱۵۰ راډیوګانې فعالې دي.

بل‌خوا د ملګرو ملتونو ښوونیز، علمي او کلتوري سازمان (یونسکو) د راډیو نړۍوالې ورځې په مناسبت ویلي چې د نړۍ له تحولاتو او پرمختګونو سره بیا هم راډیو  خلکو ته د باوري معلوماتو په رسونې کې رغنده رول لوبوي.

د دغه سازمان په وینا، راډیو د معلوماتو په خپرولو سره ټولنې پیاوړې کوي او د ناسمو معلوماتو د خپرولو پر وړاندې مبارزه کوي.

تر ۲۰۰۲ کال پورې یوازې «افغانستان ملي راډیو» وه؛ خو له هغه وروسته په تېرو دوو لسیزو کې په هېواد کې د خصوصي راډیوګانو د جوړېدو بهیر پیل شو. په دې موده کې په کابل او ولایتونو کې سلګونه راډیوګانې خپرونې لرلې او یوه هم د وطن راډیو وه چې په مرکزي ولایتونو کې نشرات درلودل او اوسمهال سټلایت له لاري نشرات کوي.